Transcriptions | Jörg Wilhalm | Harnessfighting

« back to survey page

 

Vorsatz 2r

[Notiz des 19. (?) Jahrhunderts]
Kampf und Fechtkunst zu Fuss u. zu Ross im Harnisch

  top
 

Vorsatz 2v

[Notiz Paulus Hector Mairs auf einem eingeklebten Zettel]
1561
Im khampff zu fuß stenndt – – – – 47 stennt
Im kampff zu Roß stennt – – – 34 stennt
P. H. M.

  top

1r

[Zwei Notizen Mairs]
Vonn Jorg schefflrs Erben vber kumben durch den Lenhart Zoling vnd Sie zu danckh bezolt a~ 7 dezember annun 1561 Jar

Das buch Ist maister wilhalms huders gewest ain guter vnnd ain erffarner kempffmaister vnd burger alhie zu augspurg

Hie fiertt Der maister Sein Herrn Ein in Die schrancken vnd wie er sich halttñ sol

 

top

1v

Hie kumen die zwen in die schrancken vnd wie Sey den kampff volenden wöllen

 

top

2r

Das ist die Erst hut vnd Stand

Item So du ein zu kampff lernen wilt So merckh wie er gesipt Sey oder ein gut hertz hab das er in vertraw zu fechten vnd ob er gerecht Sey oder nit ist er gerecht so weis in in die Recht kunst leg in ain schweren harnasch dar damit er brauchsam werd zum ernst sol er Ringen harnasch haben das er in brauchen mag wirt ain kampff gehapt ader gesetzt zu den dreÿen weren mit dem Spies oder schwert oder dolch So lern in zum ersten die zwen stend vnd hut wie oben gemalt stet das er im Stand gwiß Seÿ

 

top

2v

Das annder Stuck

Item die ander zwen stend oder hut wie vor geschriben Stet merck gar eben das du in deiner arwait gwiß Seiest vnd wol bedacht wie du in den man wöllest arwaiten vnd Senck dich wol gen im wie oben gmalt Satt

 

top

3r

Dat dritt Stuck

Item vermerck das drit Stuck der haist die Sechtst hutt So ainer den knopff gegen dir kert vnd hat das Schwert auff die lingken Seitñ So Senck dich wol mit deinem ortt gegen der Erdt gen im wie oben gmalt stat Schau das du dich nitt verfieren lassest dan es gat gar hibsche arwait darauß

[unleserliche Notiz zweier Wörter am unteren Seitenrand]

 

top

3v

Das viert Stuck haist die haftung

Item vermerck So ainer auff dich arwait als vor geschriben Stat So schaw du gar eben das du mechst kumen auff die haftung oder ansetzen auff Seinem fuß welcher im vor Stet trifts du In So fal mit deiner prust auff das Schwert vnd druck es wol nider So Stichtst du in wol nider durch den S fuß wie oben gemalt ist das ist das erst ansetzen oder arbait in dem kampff

 

top

4r

Das fumft haist anwerffen

Item So du sichst das dir ainer wil ansetzen nach dem fuß wie vor gemalt Stat So ge auff mit deinem Schwert Stoß im nach dem gsicht vnd dri[t] mit dem andern fuß fir so prichst du im die haftung wie oben gmalt Stat vnd Setz dich wol

 

top

4v

Das Sechst ist die haftung

Item So ainer vmb den obern stich wie oben gemalt ist nichts geben wil vnd sticht dir nach dem hindern fuß So fal mit deinem Schwert mit dein baiden henden auff Sein schwertt trucks wol Im [oberhalb der Streichung eingefügt] nider so magst du dich ledig wie hernach gschriben stett vnd bis gwiß in der arwaitt wie oben gmaltt Stett

 

top

5r

Das Sibent haist der mordschlag

Item die drit haftung oder ansetzung nach dem fuß So du das gwar wirst So nim das Schwert bey dem ortt vnd kerr den knopff fir Schlag im zu Seim helm So wirt er temisch in Seim helm wie oben gmalt Stet So wirst du ledig

 

top

5v

Das acht haist haftung

Item So dir ainer nach dem kopff schlecht oder Schlagen wil So gang auff mit deinem schwertt vnd Setz im an d mit dem ortt an Sein tengken elenpogen damit hast du im Sein mordschlag brochen vnd ge wol in dis vnd scheub in in die höch wie oben gmalt stett

 

top

6r

Das neundt vberwinden

Item vermerck die neundt arwaytt So dir ainer angesetzt hat vnd wil dich schieben wol zu Rugk So nim dein Schwert beÿ dem gehiltz in die tengk[ñ] handt vnd drit mit deinem Rechten fuß fir vnd wind im mit dem knopff nach dem gsicht So prichst du im das ansetzen vnd haftung wie vor gemal[t] Stat vnd die arwait der bruch darauff Stett wie gmalt ist

 

top

6v

Das zechent Stuck

Item So du Sichst das dir ainer nach dem gsicht arwait So drit vir mit deinem Rechten fuß ge mit deinem schwert wol in die höch vnd stoß mit deim schwert innerhalb Seins schwerts vber Sein Rechten arm das haist Zwischen baidenn armen durch gestochen vnd druck wol nider drit mit deim tengken fuß fir So hast du das an Setzen oder haftung auff Seinem Rechten fuß wie oben gmalt Stett

 

top

7r

Das alf Stuck

Item So du Sichst das dir ainer zwischen baiden armen durch wil stossen vnd dir die Sterck hatt abgewunen So trit vir mit deim tengken fuß vnd wol auff mit deim ortt nach Seinem gsicht wie oben gmalt Stett So hast du in geprochen

 

top

7v

Das Zwelfft Stuck

Item So du Sichst das dir ainer nach dem gesicht arwait So drit vir mit dein Rechten fuß vnd wind mit deinem knopff mit deiner Rechten handt vnder Seiner tengken mit dem Schwertt zeuch wol an dich wie du oben vor dir gmalt Sichst

 

top

8r

Das dreÿzechenst Stuck

Item das dreizechenst Stuck So du Sichst das dir ainer durch windt wie vor gmalt vnd gschribñ Stet So trit mit deinem tengken fuß fir vnd begreiff Sein Schwertt mit Sampt dem deinen in dein lingken handt wind wol nider das haist der klemer wie oben gmalt Stett

 

top

8v

Das vierzechenst Stuck

Item das vierzechnest Stuck So du Sichst das dir ainer wil fallen in den klemer So drit mit deinem Rechten fuß vir wind mit deim schwert vnd knopff wol auff das du im an den halß kumest zeuch wol zu Rugk So wirft du in vber den fuß wie oben gmalt stett

 

top

9r

Das fünfzechenst Stuck

Item So dir ainer wil nach der vnder haftung oder ansetzen oder wil dich vber die paiyn werffen So du im also gang auff mit deim schwert vnd drit wol vir hinder Sein fuß vnd fal im mit deim Schwert auff Sein schwertt vnd druck imß wol nider auff den halß wie oben gmalt Stet das yst der viertt haupt prich ainer

 

top

9v

Das Sechzechenst Stuck

Item So dir ainer vmb den haß wint vnd wil dich werffen So zuck den fuß an dich vnd drit wider vir mit deinem Rechten hinder seinen Rechten vnd wind mit deinem lingken wol nider dein lingkñ elnpogen hinder Sein Rechten Iechssen druck von dir So wirfst du in auff das angesicht wie oben gmalt Stet das ist der ander hauptbruch

 

top

10r

Das Sibenzechenst Stuck

Item So du Sichst vnd empfinst das dich ainer also verdrucken wil So drit mit deinem Rechten fuß fur ausserhalb Sein Rechten nim dein tengke handt vnd greiff an Sein Rechten ellenpogen Stoß wol von dir So hast du im das voder Stuchk geprochen das Sichst du wol wie oben gemalt Stett

 

top

10v

Das achzechenst Stuck

Item So dich ainer hinweg stost mit den lingkñ deinen Rechten elenpogen So ge auff mit denem Rechten arm vnd mit deim tengken Sein tengken beÿ dem elnpogen mit deiner Rechtñ handt vmb Sein halß nim in wol beÿ Seinem halß partt oder fisier zem in wol in die höch oder puck dich nider welches du wilt das ist vast ain gutter pruch vnd Stuck wie oben gmalt Stett So magst du die lerr

 

top

11r

Das nonzechenst Stuck

Item So du Sichst das dir ainer vmb den halß wil fallen vnd wil dich mit Seiner Rechten dein tengken elenpogen weck stossen So dritt mit deinem Rechten fuß fur hinder Sein Rechtñ vnd greiff mit deiner Rechten handt aussen an Sein knie mit deiner lingken handt innen zwischen Seiner pain im der kniepig heb wol in die höch Sein Rechten fuß So wirfst du in an den Rugken wie oben gmalt Stett

 

top

11v

Das zweintzigst Stuck

Item So du Sichst das dich ainer also werffen wil wie oben gmalt Stet So greiff mit deiner Rechten oben vber Sein halß in Sein Rechten elenpogen zeuch dein tengken arm wol an dich vnd leger dich wol auff in So prichst du im das voder stuck vnd druck in nider zu der Erdt wie oben gmalt Stet das ist vast ain gutter pruch

 

top

12r

Das ainvndzwaintzigst Stuck

Item So du Sichst oder empfinst das er dich also zu der erdt trucken wil So greiff mit deiner Rechten in Sein Rechts glenk vornen beÿ der hand vnd heb mit deiner Rechte Sein Rechte hand auff vber den hals vnd drit mit deinem tengken fuß vir vnd greiff mit deiner tengken hand hinden in sein harnasch oder geseß oder zwischñ der pain welches dir werden mag höb wol in die höch So wirfst du in an den Rucken wie oben gmalt Stett vnd ist vast ain gut Stuckh

 

top

12v

Das zwenvndzwaintzigst Stuck

Item So er dich an den Rugken werffen will so greiff mit deinen baiden armen ober Seiner achssel vnd greiff mit der Rechten in sein fisier vnd greiff du mit dein Rechten hand in dein tengken vnd so er dich gfast hatt mit der lingken hand beÿ deinem tengken pain vnd wil dich heben zum wurff So leger dich wol auff in truck in zu der erd wie oben gmalt Stet So hast du im sein arwait prochen

 

top

13r

Das dreivndzwaintzigst Stuck

Item So dich ainer also nider truckt zu der erd wie vor gemalt vnd geschriben stat So fal fluchs hindersich auff den Rugken So muß er mit dir fallen So wirst du ledig von im lig nit lang spring bald auff vnd stoß mit deim Rechten knie an Sein tengken fuß so muß er von dir lassen wie oben gemalt Stett

 

top

13v

Das vierundzwaintzigst Stuck

Item So du nun auffgesprungen bist eil bald zu deinem schwert ober Sich versaumpt So hast du gut arwaiten ist er behend als du vnd erwist Sein Schwert auch So eil mit deinem langen Stich auff in vnd begreiff mit dein tengken hand Sein ort begreift er das dein auch beÿ dem ortt vnd ste fest ober starck oder schwach Seÿ darnach waist du zu arwaiten wie oben gmalt Satt das haist der anfang der scherr

 

top

14r

Das vunffvndzwaintzigst Stuck

Item So du empfindst das baid schwert gfangen sein wie vor stett vn So wind fluchs durch mit dein baid armen kreutzweiß vber ain ander nimß auff dein achssel buck dich nider vnd zeuch wol an dich baiden Schwert wie oben gmalt Stet vnd ker im den Rugken das haist die schranckhutt

 

top

14v

Das Sechsundzwaintzigst Stuck

Item So ainer also auff gewunden hatt in die Scher vnd wil dir dein schwert nemen So laß im baiden Schwert mit wilen vnd fal mit deim kopff in Sein Rugken vnd greiff mit baiden henden vnden in Sein fieß an die kniepug zeuch wol an dich vnd mit dem kopff stoß von dir So wirfst du in auff den pauch wie oben gemalt Stett

 

top

15r

Das Sibenundzwannzigst Stuck

Item So dich ainer werffen wil wie vor stet so trit mit deim tengken fuß fur mit deim Rechten ker dich bald vmb vnd stoß in mit dem knopff zu Seim helm So du das Gwar wirst vnd get dir auß der arwait vnd wil dir nach dem helm stossen mit dem knopff So ge auff mit deiner tengken hand an Sein Rechte vornen an das gehultz So prichst du im den stoß greiff bald mit deiner Rechten hand nach deinem schwertt So kumpst du wider in die arwait

 

top

15v

Das achtundzwaintzigst Stuck

Item So ir gegen ain ander kumpt in die arwait So ste vest vnd schau ob er starck auff dich wel lauffen oder nit So ge mit deinem Schwertt vor im vmb im wirbel vnd thu als wöllest du in verffieren das schtuck haist der schiren brand vnd get vil arwait darauß

 

top

16r

Das neunundzwaintzigst Stuck

Item So ainer also Starck in dich wil laffen vnd Stost dir oben nach dem gsicht vnd begert der haftung oder ansetzen vnd stet vor mit seim tengken fuß So trit du vir mit deim tengken fuß vnd ge auff mit deiner lingken handt mit deim schwertt an Sein tengken handt an Sein Schwertt wie oben gmalt Stet vnd merck den trit gar wol

 

top

16v

Das dreissigist Stuck

Item So ainer Starck auff dich laft vnd wil dir die vnder haftung oder ansetzung bergert vnd stet vor mit Seinem tengken So trit du mit deinem Rechtñ fuß vir zu Seim lingkñ vnd fal mit deim schwertt mit deiner lingen handt an Sein schwert beÿ seiner lingken handt truck vnden wol von dir So stost du in mitt dem knopff in das gsicht wie oben gmalt Statt ist vast ain gutt Stuck

 

top

17r

Das ainunddreisigst Stuck

Item So dich ainer vber eilt vnd kanst zu kainer arwait mer kumen So Greiff mit deiner lingkñ hand in Sein gehultz beÿ dem knopff zeuchs im wol nider vnd Stoß mit deinem knopf vnd rechten hand in das visier wie oben gmalt Stet das stuck haist die ledigung

 

top

17v

Das zwaiunddreisigst Stuck

Item So ainer dir nach dem gsicht wil Stossen so Senck dich nider vnd drit mit deim Rechten fuß vir vnd mit deinem knopff vnd hagken greiff in oder gee durch in sein kniepug heb auff den fuß So virftst du in an den Rucken wie oben gmalt Stet S das stuck gett von baiden Seiten oder arwait von baiden seyt

 

top

18r

Das dreiunddreisigist Stuck

Item So sich ainer Senckt nach dir vnd fert dir durch die pain vnd wil dich werffen So zuck dein Rechten fuß an dich vnd fal im mit dei[m] Schwertt an Sein halß wie oben gmalt Stet So hast du im das voder Stuck geprochen vnd druck wol nider

 

top

18v

Das vierunddreisigst Stuck

Item So dir ainer das schwert also an den hals gelegt hat So ge vnden auff durch Sein Schwert wind mit deinem schwert wol auff drit mit deinem tengken fuß vir hinder seine pain leg im das Schwertt an den halß vnd mit deinem elenpogen Stoß im an Sein goder zeuch wol hindersich wie oben gmalt Stat So wirfst du in vber das pain an denn Rugken

  top

19r

Das vunffunddreisigst Stuck

Item So du Sichst vnd empfinst in der arwait das er dich werffen wil vnd dir das schwert an den hals gelegt hat wie vor stet So drit mit deim Rechten S fus fur vnd wind mit deim schwertt durch Sein baid arm das der knopff vnd das ghultz vor ste truck wol nider vnd senck dich So prichst du im denn wurff wie oben gmalt Stett das yst die viertt arwaitt aine inn kampff

  top

19v

Das sechsunddreisigist Stuck

Item vermerck die rechten stend vnd arwait So dich ainer also nider truck wie vorstet So stee auff mit deim schwert vnd merck wie du mit dein fiessen ledig mugst werden das kan man also gruntlich nit schriben vnd malen So du auff bist gangen mit dem schwert vber den kopff Stoss im flu~ nach der haftung wo der helm auff ain ander got das haist die haftung oder ansetzen so stost du in wund wie oben gmalt stett

  top

20r

Das Sibenunddreisigist Stuck

Item So du Sichst das dich ainer also wil stossen nach der haftung an dem hals So sech dich nider vnd Senck dich wol nider in die mas vnd leng vnd stoß im vnder die Rechten yechssen do der harnasch taÿlt ist So stost du in durch das pantzer blutrig wie oben gmalt ist dor nach finst du gute arwait

  top

20v

Das achtunddreisigist Stuck

Item So du also Sichst das dir ainer die haftung vnd ansetzung sucht vnd deiner Rechten iechssen vnd dein stoß nit verbringen magst wie vor stet so fal behend mit deiner gewapneten hand vnd schwert auff sein lincken hand truck wol nider wie oben gmalt stet ist vast ain gutter bruch

  top

21r

Das neununddreisigist Stuck

Item So dir ainer verfelt nach der arm wie vorstet So laß dein schwert fallen vnd Greiff mit deiner lingken hand auff sein Rechten hand vnd drit fir mit deinem Rechten fuß vnd greiff mit deiner Rechten hand zu seinen Rechten pain in die kniepug zuck dein fies an dich oder heb in auff vnd druck mit deiner achssel wol dir So wirff du in an den Rucken wie oben gemalt Stett ist vast ain gutt Stuck in dem Ringen zu dem kampff von baiden Seitten getes

  top

21v

Das viertzigest Stuck

Item So dir ainer also vnder laft in dem Ringñ vnd wil dich werffen so mach dich ledig mit den fiessen vnd greiff mit deiner rechten hand vnder Seim vchssen vnd greiff mit deiner tengken hand vber Sein Rucken in das geses so wirfst du in an den Rugken wie oben gmalt Stet vnd hernach findst in den kunsten vnd bis gewis in der arwait es seÿ im schwert oder im Ringñ

  top

22r

Das ainundviertzigest Stuck

Item So du ainen also auff den Rugken hast geworffñ wie vorstet So schau bald das du auff in kumst vnd mit deim dolch die haftung suchest wo du in gewinen magst so du in gewunen hast wie oben gemalt stett So spring im zu ober sich zu dem hailligñ grab geben wil oder nit

  top

22v

Das zwaÿundviertzigest Stuck

Item So du empfindst das dich ainer an den Rugken geworffen hatt So stoß mit deiner Recht hand oder mit deiner lingken mit welches es dir am ersten kumen mag vnd stoß in an sein Rechten ellenpogen oder begreiff in halt in vest welches du amm negsten kumen magst vnd wind dich behend vmb So wirfst du in auff den pauch So Sitz behend auff in vnd schau wo du in gewinen magst wie oben gemalt stett das ist das pest Stuck im kampff zu Retigung seins lebens

  top

23r

Das dreindviertzigest Stuck

Item So du also auff ain sitzst vnd er wil sich vnd~ dir auff winden wie vor geschriben vnd gemalt stet So greiff mit deiner Rechten in Sein tengken öllenpögen vnd mit deiner tengken greiff im in Sein Rechten So er andem Rugken ligt wie oben gmalt Stett So werst du im das er vnde~ dir nit auff mag sten du must deine pain wol in hutt haben das er dirs nit begreiff er wurd Sunst ledig von dir das Seind die besten Stuck Im kampff

  top

23v

Das vierund viertzigist Stuck

Item so er sich also vnder dir hat vmgewunden So heb in vest mit deinen armen auff Sein armen würff in vmb auff den pauch knie hinden mit deinem knie auff Sein fieß vnd stich mit deinem dolch die ples oder haftung wie du im am negsten gewinen magst wie oben gemalt stet das ist vast ain gute arwaitt

  top

24r

Das vumffvndviertzigist Stuck

Item So du ainen also vmb hast geworffen vnd kumst auff in vnd wild im also das leben nit nemen So greiff nach deim oder Seim schwertt welches dÿr am nechsten ist Stoß ims vber Sein Rugken vnder den armen das baÿd arm auff dem schwertt ligentt So mag er nit auff Sten So magst du dein dolch zucken wie oben gmalt Stett vnd magst im zusprechen nach deinem gewissen

  top

24v

Das Sechsundviertzigest Stuck

Item So du gewiss wilt Sein in der kunst vnd in dem kampff den dich dan dein maister gelernt hatt vnd im das schwertt durch gestossen hast so Schaw das du ain Remen oder strick du oder dein maister beÿ dir habst vnd bind im die arm zu Samen wie oben gemalt Stat So mag er nit auff sten du magst auff in knieen oder Sitzen

  top

25r

Das Sibenundviertzigest Stuck

Item So dir gett das gluck gebñ hatt vnd wol gel?gen ist vnd in gepunden hast vnd im das leben nit nemen wild So las in ligen ge von im gib im den Segen wer er mag nit auff wen er mied wirt wirt er sich wol geben das ist ain bschluss des kampfs

Item vermerck das pest Stuck So du klain vnd schwach bist So schaw So ain starcker mit dir kempft vnd wil in dich lauffen vnd Sich Seiner Sterck tröst vnd dich vberstossen wil So Setz dich wol in die wag vnd mach dich klain vnd ker die seitten fir auff welche er laufft So dritt du auß auff die ander Seitten

  top

25v

[Leere Seite]   top

« back to survey page