Transcriptions | »Codex Wallerstein« | Longsword

« back to survey page

3r

leng

Item so du mit ainem vichst vnd zu im kumst an das
swert das ir paid an hapt gepunden so reck dein arm vnd
dein swert lanck von dir vnd secz dich mit dem leib nider
in dy wag vnd sich dastu leng vnd masß in dem swert
habst so magstu arbaiten vnd weren alles das das notturft
ist dy leng das ist dastu hinter deinem swert stest vnd
reckst dich dy masß ist dastu nider stest als hie gmalt
stet vnd mach dich klain mit dem leib so pistu groß im swert

Von der Hand Paulus Hector Mairs (später hinzugefügt):
der stennt Im Lanngen schwert
Stenndt 24 bar

top

3v

masß

Item alstu ainem an pinczt an das swert so slach im lanck
ein mit dem ort zu dem gesicht vnd wint im mit der
kurczen sneid ein in das angesicht als hie gmalt stet
so magstu im ein reissen mit dem knopf oder mit
gewappenter hant in das gesicht stossen

top

4r

swech

Item so dw ainem an pinczt an das swert so wart ob er
waich oder hert sey ist er hert so wint im in das an
gesicht als vor geschriben stet ist er aber waich so such
dy swech seins swercz vnd wint im vber auf dein tenke
saiten als hie gmalt stet so magstu im nach dem
kopf snappen vnd dy pless suchen

top

4v

sterck

Item haustu ainem oben ein in das swert vnd er helt
starck wider so uar auf in dy höch mit deinem swert hinder-
sich an seinem swert gegen seiner swech vnd das dein
gehilcz an seinem swert stee vnd wint im dy kurcz
sneid an den hals als hie gmalt stet so magstu
in mit gewalt auf dy erden ziechen

top

5r

vor

Item so du ainem in das swert pinczt vnd er slecht
dir starck ein zu dem kopf so versecz im mit der
zurczen sneid vnd dring in in so musß er slachen
slecht er den zu der anderen seiten so lege im
dein swert auf sein tencke agssel als hie gmalt stet
so slechstu in an ein or das haist ein gelegt vnd
vnd haist uor

top

5v

nach

Item so dir ainer oben starck ain haut so wart vnd
versecz im dy hew mit der kurczen sneid ist er
dan als pehent vnd haut ee wen du im ain
magst legen so lasß in frey hawen vnd uall im mit der
kurczen sneid auf sein swert als hie gmalt stet so
pincztu in vnd slechst in an das or vnd ge fursich

top

6r

fülen ynndes

Item so dir ainer in das swert pint vnd will dir in das an-
gesicht winden oder ander kunst treiben so wint auch
auf vnd gee reschlich fürsich in in vnd als pald er
etwas arbaitten will so uall im starck in sein arm
und stoß in zuruck als hie gmalt stet so wurfstu
in an den rucken

top

6v

Item so du ainem an pinczt vnd er wint dir ein zu
dem gesicht so wint im auch ein vnd stee uest in dem
winden vnd empfind an seinem swert als so dastu
in nit von deinem swert last kömen das er zw
kainer arbait mag kömen das ist die grösst masß
dez swercz vnd stee starck in der wag als gmalt stet

top

7r

Item pincztu ainem in das swert vnd er wint dir
ein zu dem gesicht mit seiner kurczen sneid so wint
auch hoch auf in dy höch vnd wen er auf uert vnd
wil das verseczen so haw im einen uerzuckten haw
nach seinem elpogen alz hie gmalt stet

top

7v

Item so du ainem nach dem elpogen hast gehawen
als da hinden gmalt stet verseczt er denn den
haw so stosß im sein swert nider mit deinem gehilcz
vnd uall im mit dem knopf vnd mit paiden armen
vber vnd leg im dy kurcz sneid nach d an den
hals vnd zeuch in als hie gmalt stet

top

8r

Item mer ein stuck wen du im nach dem
elpogen slechst vnd er uerseczt denn haw so pleib sten
mit deinem swert an dem seinen vnd trit für mit
dem rechten fuß als welstu im zu der anderen seiten
slachen vnd sneid in auß nach seinem tencken oren
als hie gmalt stet das haist die ausser mynn

top

8v

Item mer ein solichs stuck wen du im nach dem
elpogen slechst verseczt er denn den slag so uar hoch
auf mit deinen paiden henden vnd lasß dein tencke
hant uaren vnd uall im vber sein paide arme vnd slachs
hinter dein tencke seiten vnd stich mit deinem swert
zvischen dir v dein und sein durch vnd leg im
das swert an den hals als hie gmalt stet so prich-
stu im den arm ab vnd sneist im den hals ab

top

9r

Item dir ainer dein swert also hinter sein tenck
vgssen geuangen hat vnd wil dich slachen oder stechen
stechen so fleuch hinter in aus seinem slag vnd uall
mit deiner tencken uorn in dein swert vnd wint in
herfür als hie gmalt stet so prichstu im den arm ab

top

9v

Item so dir ainer oben an dein swert pint so wint
im dy kurcz sneid nach dem angesicht ein vnd
gee inndes vnd trit für mit dem tencken fusß
vnd uall im mit deinem knopf vber sein hent vnd
uach dein klingen in dein tencke hant vnd leg
ims an den hals als hie gmalt stet so würfstu
in auf den rucken

Dy geschrift gehört zu dem andern stuck dauorn

top

10r

Item so dir ainer nach dem elpogen hat geslagen
vnd uacht dir dein swert mit seiner tencken hantt
als uor vnd wil zvischen dir vnd im durch stechen
nach deinem hals als uor so uach sein swercz klingen
in dein tencke hant vnd leg ims selb an seinen
hals als da hie gmalt stet vnd hinter trit in so
würfstu in auf den rucken

Dy geschrift gehört an das hinter stuck vnd iene
gehört her vber

top

10v

Item so dir ainer an das swert pintt vnd wint dir
in das angesicht so wint auch vnd lasß den knopf
uaren als uor vnd ual im vber vnd hinter trit in vnd
leg im das swert an das haupt als hie gmalt stet
so würfstu in auf den rucken

top

11r

Item wint dir ainer ein in das gesicht so greif
pald mit deiner tencken hant in dein swercz klingen
vnd stich vber sein swert im zu seinen hoden d als
hie gmalt stet das ist gar ein gucz namhafcz stuck

top

11v

Item ein gucz swert nemen wen dir ainer oben an
pint an das swert so wint auf mit der kurczen
sneid vnd gee uast inndes in in vnd greif mit deiner
tencken hant in sein pint zvischen seinen henten vnd gee
mit den knopf vber sein klingen vnd stoss in gegen
dem maul als hie gmalt stet so nymstu im das swert

top

12r

Item ein anders swert nemen wen dir ainer an
pint vnd will dir ein winten zu dem gesicht so
greiff pald mit deiner tencken hant in paid swercz
klingen vnd zeuchs auf dein tencke seiten vnd gee
mit deinem gehilcz vnden an sein hend vnd dauch
vbersich als hie gmalt stet so nymstu im das swert

top

12v

Item gar ein gucz verporgens stuck für einen redlichen
starcken man wen dir ainer in das swert pint vnd
wil dir ein wintten oder stechen so wint auch uast
auf vnd gee mit der kurczen sneid starck an sein
swert vnd gib im einen grossen stosß mit paiden henden
fürsich an als so kert er sich vor dir vnd so slach
in auf den kopf als hie gmalt stet

top

13r

Item mer ain gucz swert nemen wen dir ainer
an pint an das swert so uar im pald mit deiner
rechten hant in sein swert zvischen seiner paider hentt
in das pint vnd zeuch an dich vnd scheub mit deiner
tencken mit dem creutz sein swert an weg vnd stosß in
mit dem knopf in das maul als hie gmalt stet

top

13v

Item mer ein swert nemen wenn dir ainer an pintt
vnd will dir in das gesicht winden so pleib stenn in
der langen sneid vnd uar hoch auf vnd uar im mit
dem knopf zvischen seinen hent ein vnd mit der tencken
hant uasß dein klingen vnd wint im an den kopff
als hie gmalt stet

top

14r

Item mer ein swert nemen wenn dir ainer an das
swert pint so pint im auch starck ein vnd dauch in hinder
sich zu ruck vnd lasß dein tencke hant uaren vnd greif
im vber seinen rechten arm in das swert s czvischen seinen henten
vnd zeuch hindersich als hie gemalt stet

top

14v

Item ein gut stuck wenn dir ainer an das swert
pint so wint im reschlich ein vnd ual mit dem knopff
vber vnd greif mit der tencken hant in dein klingen vnd
trit mit dem tencken fuß hinder in vnd leg ims swert
an hals vnd zeuch in ann rucken vnd stichs swert
in in als hie gmalt stet

top

« back to survey page