Albrecht Dürer – Mordschläge
101r
Hie heben sich an die
mortt schleg
Item der erst mortt schlag drifft fast
in vnden vnd thů sam du Im inwendig
zů dem gesicht wellest stechen laß dan dein
rechte hand varen von deynem bind vnd
kum do mit deiner lincken hand zu hilff
Indie schwertz klingen vnd schlage Im
mit dem knopff oder mit dem gehiltz oder
mit dem bind zů seinem knopff [!] etc
Ein bruch dor wider
Item wan man dir zů dem kopff schlecht
so voche den schlag zwischen dein beyde
hende In deines messers klingen vnd winde
mit dem knopf auf dein lincke seytten
über deyn gehiltz vnd zuch vast andich
So zuckestu im sein schwert auff seiner
hand Item stichstu Im aber Inwendig
zu seim gesicht vnd laß aber dein schwert
mit beyden henden bey der klingen vnd fach [!] ime
mit dem knopf zu der lincken achsellen etc
Ein ander mortt schlag
Item vach dem schlag zwischen dein beyde
hende in die klingen vnd wende mit dem
knopf von oben nider über sein gehiltz vnd
ruck fast an dich so nimstu aber das
schwert also var etc
Der dritt mortt schlag
Item thů seynem lincken ellenpogen den
bruch also du die forig gebrucht hast etc
101v
Der vierd mortt schlag
Thü also du Im zu seinem gesicht wellest
stehen vnd schlag in mit dem knopf auf
sein lincke knibugen etc
Der bruch dor wider
Item wer dich dir zů dem lincken knibug
schlecht so vahe den schlag zwisschen
dein beyde seyten hende in des schwertz klingen
vnd das dein knopf gegen der erden stee
vnd wend von vnden auf dein r. s. vnd
druck vast hinder sich so nimpstu Im
das schwertt etc
Der fünft mort schlag
Item thů aber sam du im willt an-
setzetzen [!] Inwendig In das gesicht vnd
schlag In mit dem In dem in seyn
lincken enckell etc
Der bruch dor vider
Item wer dir zů dem enckel schlecht so
laß dein schwert vorn bey dem knopff
vnd mit dem bind In die erde so vachestu
vachestu den schlag in das gehiltz vnd
spring reß mit dem rechten bein hinder
sein lincke seytten so gewinestu In den ruck
Vier an setzenn
Item gee reß In an vnd setz Im an sein
gesicht ader an sein hals ader an sein brust
ader an sein lincke achsel
Ein bruch dor wider
Hatt er dir angesetzt mit seinem schwert
in dein brust So var mit deyner lincken
hand von aben nider auf sein schwertt
vnd halt das fest bey dem ortt vnd
stich dem mit deinem schwert hinder seinß
lincken beinß vnd scheuß mit deiner
brust Inwendig [!] fur dich vnd ruck
deynem leyb bald auß seim ortt stosß
Im mit deyner lincken hand vnder
sein gesicht oder sein brust hindersich
vber dein schwertt etc
Item hat er dir aber angesetzt vnd du
im auch so stich mit deinem schwertt
hinder sein hand schlach vnd lauff
fursich auf dein lincke seytten etc
Aber ein losung
Item won ir beyde schwertt haben
angesetzt so griff mit deiner lincken
hand ausen über sein lincke vnd zuck
den ortt vnd stich von vnderim auf
in sein linckenn arm etc
Amen