Joachim Meyer, Rostock | Dolch 2
Inhalt:
86v
Nondum per aliũ magistrũ
1 Item sticht er denn obernstich tzu dir, so far vonn vntenn auf mit der Rechtenn ewbichen hanndt vnter sein Rechte hanndt, vnnd begreif im denn arm, vnnd mit der linckenn hand vber sein
87r
Rechtenn arm, thu denn degenn von dir, so nimbstu im denn degenn, oder wirf in vber ein pain.
2 Item sticht er denn vnternn stich, greif mit deiner Rechtenn handt auf sein Rechte handt, vnnd mit deiner linckenn handt auf sein Rechtenn arm, vnnd Ruck in ann dich, so gewinst im den ruck an, so magstu wol mit der linckenn handt greiffen an sein hals, vnd setz im ein pain vnd wirf in, auch merck das er sein pain nit zuck, vnnd er dir thu, das du im wilt thun.
3 Item sticht er auf dich den obernstich, so fal im mit der linckenn handt, vnter sein Rechte handt, nahendt bey dem degenn, vnnd halt fest, vnnd mit der Rewlich~ handt, an die kling, vnnd brich vbersich, so nimbst im denn degenn. Optimum, Wil er dir also denn degenn nemenn, wen er greift ann die handt, so Ruck auf, vnnd mit der linckenn handt schlag im an sein lincken arm, so beheltstu denn degenn.
Item sticht er denn obernstich, so fal im mitt der
87v
linckenn hanndt an sein Rechte handt, vnter dem degenn, vnnd mit der Rechtenn ewbichen handt, far ann die klingenn, vnd prich vbersich so nimbst im denn degenn, vnnd trit mit dem Rechtenn pain tzu Im, vnnd mit der linckenn hanndt stos in vonn dir, so muß er dir den Ruck gebenn.
Item sticht er auff dich denn obernstich, so halt dein tzwu hendt creutzling auff deim pauch, die Rechtenn handt vber die tenck, den linckenn fus vor, wenn er sticht so far mit baiden henden, auf, vnter sein degenn, vnnd fahe im den stich tzu hanndt, begreif in mit der lincken ewbichen hanndt, seinenn Rechtenn arm vnnd prich im denn arm von vmb, so nimbst im dem degen. Optimum si quis tibi velit sic facere, so trit mit dem Rechtenn pain hinter sein lincks pain vnnd mit der linckenn hanndt, nim das gewicht an seim Rechtenn Elnpogen, Ruck den
88r
degenn tzu, vnd stos in vber ein knie.
Degenn wider degenn, sticht er denn obernn stich, so hab dein degenn tzu einem Vnterstich, vnnd wenn er sticht, so kum mit deim linckenn arm, vnnter sein Rechte handt, also das dir dein Elnpogenn, vnnd die hanndt gleich stehe, so sticht er dir vber deim arm, so begreif in mit der linckenn handt sein Rechten arm vnnd halt fest, vnnd verreid im denn arm, so nimbst im denn degenn, stich in In denn pauch. Optimum si quis tibi vult facere hoc, Wenn er dir dein arm verreidenn wil, so las denn degenn einem vmb sein arm, vnd ruck ann dich.
Mit lerer hanndt, sticht er denn obernstich, so fal mit baidenn hendenn an sein arm, vnd ruck vntersich, oder nim war ob du inn möchst, gewerffenn vber ein pain. Optimum wenn er dir den arm begreift, so fal mit der linckenn hanndt vber sein paidt arm, vnnd die Rechtenn hand mit dem degenn ruck ann dich, so gewinst vortayl.
88v
Sticht er denn obernstich, so fal im mit der linckenn hand, vnter sein Rechtenn arm, vnnd begreif im denn arm, vnd mit der Rechtenn hand an den hals, vnd trit mit dem Rechtenn pain hinter das sein, so wirftsu in, oder reid inn den arm vmb, so nimbst im denn degenn. Optimum, Wenn dir also einer den degen wil nemenn, so las dein degenn gehenn vber sein arm mit der linckenn handt, stos im sein Rechte handt vonn dem hals ruck denn degenn vnd das pain tzu dir so gewinst wider ein forteil.
Sticht er denn obernstich, so begreif im sein Rechtenn arm von vnten auf mit deiner linckenn handt, vnd halt fast mit der Rechtenn handt, sein vorders pain ruck ann dich so felt er. Optimum, So wechsel denn degenn vber den arm, vnd Ruck das pain an dich mit sampt dem degenn, so kumbstu wider tzu eim vortail.
Mit lerer hanndt, sticht er den vnternnstich, fal im mit deiner Rechtenn handt auff sein Rechte
89r
hinter dem degenn, vnnd mit der linckenn hanndt ann sein Elnpogenn vonn vnten auf, vnnd mitt der linckenn handt stos sein Elnpogenn vonn dir, vnnd mit der Rechtenn handt hinter sein Ruck, so brichstu im denn arm vnnd felt. Optimum. Als du auff in stichst vnnd er dir dein hanndt wil fassenn, so stos mit deiner linckenn hanndt, an sein Rechte achsel, von vntenn auf, vnd tzuck den degen tzu dir.
Sticht einer denn mitternn stich, so begreif im mit deiner Rechtenn handt, sein Rechte handt, vnter dem degenn, vnnd mit der linckenn hanndt, far vorn an denn hals, vnnd wirf in vber ein pain, das stuck magstu prechenn als vor in dem mitternn stuck, geschribenn stet, do er greift mit der lincken handt an denn Elnpogenn.
Sticht er denn vnternn stich, so fal mit deim linckenn arm auf sein Rechtenn arm, vnnd greif im denn arm vonn vntenn vmb zu handt, so begreif im mit deiner Rechtenn handt sein Elnpogenn, vnnd ruck an dich, vnnd mit der linckenn handt prich im sein
89v
hanndt, hinter sich auff sein Ruck, vnnd mit deiner Rechtenn hanndt greif vonn seim Elnpogenn ann sein Rechte hanndt vnnd halt fest, tzuckstu so mus er fallenn, so magstu mit deinem knie auf in sitzenn, so ist dir dein Rechte hand ledig, so thw mit im was du wilt. Optimum. Wil dir einer das thun, so wart ebenn auff in, wenn er dir auff denn arm wil falnn, so tzuck ann dich, vnnd mit der linckenn handt stos in vonn dir.
Sticht einer denn obernnstich, so fal im mitt deiner linckenn handt, vnter sein Rechte, vnnd begreif im denn arm vnnd tzu handt mit deiner Rechtenn ewbichenn handt mitten an degenn, vnnd ker im denn spitz tzu seiner prust vonn obenn vmb, so mus er dir denn degen lassenn, Vnnd sih ebenn wenn er dir den degen lest, das er dir nit tret mit seinem pain hinter das dein, vnnd dich wil werffenn, Optimum, so
90r
tzuck dein pain hinter das sein, vnnd thu im als er dir wolt habenn gethann.
Sticht einer denn vnternstich, so fal im mit deinem linckenn arm oder mit der handt, auf seinenn Rechtenn arm, hinter dem degenn vnnd halt fest vnnd mit der Rechtenn handt, fal im an die klingen vnnd brich vntersich, also das im der Spitz seins degenns kum in sein leib. Ist er im harnasch vnnd lest dich begreiffenn als vor in dem nechsten stuck geschribenn stet, das masgstu prechenn als du in dem vordernn stuck gelert bist.