Paulus Hector Mair - Hellebarde

200r
[Pdf-Seite 403]

Die Stend
In der Helle~par-
ten .

200v
[Pdf-Seite 404]

[Leere Seite]

201r
[Pdf-Seite 405]

Das Register so ÿber die
• 20 • stennd der hellenparten gehört • volgt hernach

A
Anpůnd daraůß ain Reissen geet 5
Anpůnd mit ainem obern sperren 6

B
Bainbrůch gögen ainem Nackhstoß 20

E
Ein winden mit ainem wůrff 14

G
Geschrenckter wechsel gögen ainem abnemen 3
Gesichtstoß gogen dem průsthaw˚ 4

H
Hellenparten nemen mit ainem wůrff 19

I
Iberwinden aůß dem a˚npůnd mit ainem vndern sperren 8
Inwendiger Armstoß gögen ainem gesichtstoß 9

O
Obers einhawen mit ainem vndern Reissen 7
Obers ÿbergeen mitsampt ainem seitenstoß 15

P
Pruststoß mit ainem sperren 10

S
Schnit mit ainem wůrff aůß dem hacken 17

V
Vnderhaw˚ in der Hellenparten von baiden seiten 2
Vnderer průsthaw˚ gögen ainem Oberhaw˚ mit ainem Reissen 11
Vnders reissen gögen ainem gewallt stoß 13
Vnderhaw mit ainem absetzen in der halben hellenparte~ 16
Verkerer gögen ainem vnderhaw • 18

Z
Zwen oberhaw˚ in der Hellenparte~ von der lincken seiten 1
Zwaÿ obere reissen aůß dem anpůnd 12

201v
[Pdf-Seite 406]

[Leere Seite]

202r
[Pdf-Seite 407]

Die ersten zwen oberhew Inn der Hellenparten
Vonn der linckhen seiten
1

Item schickh disem Stuckh dich also mit dem zůfechten • stannd mit deinem linckhen fůoß vor vnnd hallt dein Hellenparten ob deinem haůpt Indes volg mit deinem rechten fůoß hinnach vnnd haw˚ Im nach seinem haůpt • haw˚t er dir dann also nach deinem haůpt • vnnd dů aůch gögen Im steest Inn dem Oberherhaw˚ mit deinem lincken fůoß vor • so setz den zůrůckh vnnd haw aůch von oben gleich mit Im ein so ist sein haw˚ vmbsůnst Inndem gang aůff vnnd stoß Im zů seinem gesicht mit deinem vordern orth versetzt Er dir das so wechsel důrch von seiner lincken aůf sein rechte seiten vnnd setz Im mit deinem plat an seinen rechten arm • hat er dir also angesetzt • so trit mit deinem rechten schenckel zů • růckh so haw˚stů dich damit von Im • Inndem streich aůf mit deiner hellenparten Im vor seinem gesicht vnnd In dem streichen pind Im an sein hellenparten aůf sein lincke seiten Indes wend dein hellenparten vnnd Raiß damit zů dir • Ist er starckh vnnd will dir mit nach hengen • so trit mit deinem rechten schenckel wider hinein vnd stoß In zů seiner průst stost er dir also zů deiner průst • so trit mit deinem lincken schenckel wider zůrůckh vnnd setz Im den stoß ab mit deinem hindern Orth so bistů sein on schaden ledig

202v
[Pdf-Seite 408]

Der vnnderhaw • In der hellparten von baiden
• seiten •
2

Item schickh dich also mit Disem zůfechten In den vnnderhaw˚ stee mit deinem lincken fůoß vor vnnd halt den orth vnder sich gögen dem Man In dem ganng mit deiner rechten hand aůf dein rechte hůfft vnnd stoß Im damit zů seinem gesicht oder der průst • setzt Er dir den stoß ab • so wechsel důrch von seiner lincken aůf sein rechte seiten • stost er dir also zwifach zů deinem gesicht vnnd dů mit deinem linckhen fůoß vorsteest • aůch In dem vnderhaw˚ • so far mit deiner rechten hand In dein rechte hiff mit deiner hellenparten vnnd setz Im das ab aůf dein rechten seiten mit deinem plat Indes volg mit deinem rechten schenckel hinnach vnd setz Im deinen vordern orth an sein průst • setzt er dir den Ort also an dein průst • so trit mit deinem linckhen schenckel zůrůckh • Indes zeůch den rechten aůch behend zůrůckh so magstů wider mit Im zů gleicher arbait kůmen • vnnd haw˚ Im mit ainem oberhaw˚ zů seinem haůpt • haw˚t Er dir also oben ein so far aůf mit deiner hellenparten von vnnden • so fachstů seinen haw˚ • Inn dein plat Indes zůckh vnd stoß Im nach seinen gemechten vnnd zeůch dich damit zůrůckh •

203r
[Pdf-Seite 409]

Der geschrenckht wechsel gögen ainem abnemen
3

Item schickh dich also In den geschrennckten Wechsel • stee • mit deinem lincken fůos vor • dein lincke hand vnder deiner rechten Vchsen • Indes trit mit deinem rechten schenckel hinnein • wind dich damit zwifach • In den vnnderhaw˚ vnnd stoss Im nach seinem linckhen schenckel • wirstů des stoß gewar vnnd stast gögen Im Inn dem abnemen deinen lincken fůoß fůrgesetzt • so far mit deiner rechten hannd aůf dein rechte seiten • so nimpstů Im seinen stoß hinweckh Indes volg mit deinem rechten schennckel hinnach vnnd stoß Im deinen vordern Ort • zů seinem gesicht • stost er dir dann also zů deinem gesicht • so setz Im das ab von deiner lincken aůf dein rechten seiten mit mit der sterckh Indes streich aůf von ainer seiten zů der anndern Im vor seinem gesicht • vnd Inn dem aůfstreichen pind Im ^an sein Hellenparten • Inndem wechsel Im zwifach důrch vnnd stoß Im nach seinem gesicht • stost er dir also zů so nimb Im das ab mit deinem plat das dir der stoss ob deinem Haůpt • hinaůss ganng Indem volg mit deinem lincken schenckel hinnach vnnd schlag mit deinem hindern Ort sein hellenparten hinweckh so bistů von Im ledig

203v
[Pdf-Seite 410]

Ein gesichtstoß gögen dem prusthaw
4

Item schickh dich also In Den gesichtstoß • stannd mit deinnem linckhen fůoß vor vnnd hallt dein hellenparten aůf der průst das die schneid oben gewendt seÿ Indes volg mit deinem rechten schenckel hinnach vnd stoß Im zů seinem gesicht • stost er dir also zů deinem gesicht • vnnd dů mit deinem lincken fůoß vor stest • so gee aůf mit deinem průsthaw˚ vnnd setz Im seinen stoß darmit ab • Indem so trit mit deinem rechten schenckel hinnein vnd stoß Im zů seiner průst • versetzt Er dir das • so wechsel an seiner hellenparten důrch von seiner rechten aůf sein lincken seiten Inndem trit mit deinem lincken fůoss fůr seinen rechten • vnnd stoß Im zwifach zů seinem gesichte Stost er dir also zwifach zů • so setz Im den stoß ab von baiden seiten vnnd trit mit deinem lincken schenckel hinnein vnnd wechsel Im důrch von seiner rechten • aůf sein lincken seiten • vnnd stoß Im damit zů seinem lincken Arm • versetzt er dir den stoß so wind Im deinen hindern Ort • von vnnden aůf zu seiner průst • windt er dir also seinen hindern Ort zů deiner průst • so trit mit deinem lincken schenckel zůrůckh • so ist sein winden vmbsůnst • Indem stoß Im zů seinem gesicht • vnd zeůch dich damit zůrůckh mit ganntzer vnnd halber hellenparten •

204r
[Pdf-Seite 411]

Ein anpund darauß ain Reyssen geet
5

Item schickh dich allso In den Anpůnd • stand mit deinem linckhen fůoß vor • dein hellenparten mit deinem hindern orth aůf deiner rechten hůff den orth gögen seinem gesicht vnnd pind Im an von deiner rechten seiten aůf sein lincke • Inndem wind dein hellenparten • behend vber die sein vnnd reiss damit zů dir • stastů dann aůch allso gögen Im Inn dem Anpůnd mit deinem lincken fůoß vor • vnnd Er also an sich reist • so volg mit deinem rechten schenckel hinnach vnnd stoss Im zů seiner průst hinnein ob seinem lincken Arm • Wirt er das stoß gewar • vnnd versetzt dir den • so wechsel důrch von seiner lincken • aůf sein rechten seiten • vnnd stoß Im zů seinem gesicht • Sůcht er dir deine plössen also von ainer seiten zů der anndern • so trit mit deinem lincken fůoß zůrůckh vnnd setz Im das ab mit deinem hindern Ort • aůf baid seiten • Indem trit mit deinem lincken schenckel • wider hinnein vnnd wind dich mit dem plat hinfůr vnd nimb Im damit sein hellenparten hinweckh Indes stoß Im zu seinem gesicht • setzt er dir das ab so sůch Im seine plössen von ainer seiten zů der andern In dem důrchwechsel vnnd zeůch damit zwifach ab / •

204v
[Pdf-Seite 412]

Ein anpinden mit ainem obern sperren
6

Item schickh dich also mit Disem zůfechten • stannd mit deinen linckhen fůoß vor stat Er dann aůch gögen dir Inn gleichem anpůnd seinen lincken fůoß fůr gesetzt • so pind Im vornen an sein hellenparten vnnd Inn dem Anpůnd • so wind Im dein plat • vber seinen hagcken • begert er dir also einzůwinden • so wend dein hellenparten vnnd scheůb damit vbersich vnnd In dem zůckh • dein hellenparten oben behend vnnd stoss Im zů seinem gesicht oder der průst • setzt Er dir den stoß ab so streich Im mit deiner hellenparten vor seinem gesicht aůf Indem sůch Im die nechst plöse • sůcht er dir deine plössen also so setz Im das ab mit deinem vordern Ort • deiner hellenparten • volg mit deinem rechten fůoß hinnach vnnd schlag Im mit deinem hindern orth sein hellenparten hinweckh vnnd wind Im damit zwifach von vnnden zů seinem gesicht oder der průst • wirt er des einwindens gewar • vnnd trit damit zůrůckh so raiß Im zwifach nach mit hew˚en vnnd mit winden • Raist er dir also mit disem stůckh nach so setz das ab mit deinem hindern vnnd vordern orth deiner hellenparten • trit damit zůrůckh vnnd hab deines gesichts acht mit gůter versatzůng •

205r
[Pdf-Seite 413]

Ain obers einhawen mit ainem vndern Reÿssen
7

Item schickh dich Allso Inn das ober einhawen • stee mit deinem lincken fůoß vor vnnd hallt dein hellenparten Inn dem oberhaw˚ • stat er dann aůch gögen dir seinen lincken fůoß fůrgesetzt • sein hellenparten dir gögen deinem gesicht • so nimb Im das ab mit dem oberhaw˚ Indes reiss zů dir von deiner lincken aůf dein rechten seiten vnnd In dem reissen gang aůf mit deiner hellenparten Im zů seinem gesicht • Begert er dir also zů deinem gesicht zů geen so wend dein hellenparten mit dem plat hinder seinen schenckel vnnd zeůch damit an dich • so ist sein stoß vmbsůnst • vnd magst In aůch damit fellen • Indem raiß Im nach mit ainem stoß zů seinem gesicht • stost er dir also zů deinem gesicht • so nimb Im das mit deiner halben hellenparten ab vnnd wechsel Im důrch von ainer seiten zů der anndern vnnd sůch Im damit die nechsten plossen • setzt er dir das ab • so pind gleich mit Im an sein hellenparten • vnnd Inn dem anpůnd wind mit deinem hindern Ort seinen vordern hinweckh • vnnd trit mit deinem rechten fůoß Innwendig fůr seinen lincken Indes far Im mit deinem hindern orth vmb seinen hals aůf sein rechten seiten zeůch In damit zů dir so magstů In werffen • begert er dich also zů werffen • so verwechsel baid hend an deiner hellenparten • vnnd setz Im dein hellenparten an seinen rechten arm • scheub In damit von dir • so bistů sein on schaden ledig •

205v
[Pdf-Seite 414]

Ein yberwinden auß dem anpund mit ainem
• vnndern sperren •
8

Item schickh dich also In dises stůckh • stannd mit deinem lincken fůoß vor • dein hellenparten aůf deiner rechten průst • den ort gögen seinem gesicht • Indes trit mit deinem rechten fůoß hinnein vnnd haw˚ Im mit ainem verkerten haw˚ nach seinem haůpt haw˚t Er dir also oben ein vnnd dů mit deinem linckhen fůoß vor stast • so versetz Im das mit deinem plat Inn dem pind gleich mit Im an • vnnd In dem anpůnd wechsel Im důrch von seiner lincken aůf sein rechten seiten vberwind Im damit sein hellenparten vnnd trůckh starckh vnnder sich • hat er dich also also gespert • so volg mit deinem lincken fůoß hinnach vnnd wind dich mit deiner hellenparten widerumb starckh aůf Im den Ort zů seinem gesicht • setzt er dir das ab so trit mit deinen rechten fůoß fůr seinen lincken • vnnd wind dich mit deinem hindern ort zwischen seinen baiden Armen hinein yber seinen rechten Arm • trůckh damit vnnder sich aůf dein rechten seiten • so magstů In mit deinem plat zů seinem haůpt schlagen • hat er dir also hert eingewůnden • so wechsel dein lincken hand behend widerůmb důrch an deiner hellenparten • Indes trit mit deinem lincken fůoß zurůckh vnd vnnd schlag Im mit deinem hindern ort nach seinem haůpt

206r
[Pdf-Seite 415]

Ain Inwendiger armstoß gögen ainem gesichtstoß
9

Item wann Ir Mit dem zůfechten zůsamen koment vnnd er dir Zů dem gesicht stost • so trit mit deinem lincken fůoß hinnein vnnd stoß Im Inwendig nach seinem lincken Arm • vnnd Indem setz Im das plat an so scheůbstů In damit von dir aůf sein rechten seiten vnnd ist sein stoss vmbsůnst • Indes zůckh dein hellenparten behend zů dir vnnd stoß Im mit deinem vordern Ort zů • seiner průst • stost Er dir also zů deiner průst • so setz deinen lincken schenckel zůrůckh vnd setz Im das ab mit deinem plat • Inndem ganng mit deiner hellenparten aůf Im fůr sein gesicht trit mit deinem lincken fůoß widerůmb hinnein vnnd wind Im deinen Ort zů seinem gesicht • oder der průst • windt er dir also deinem gesicht zů • so nimb Im das ab von ainer seiten zů der anndern Inndem trit mit deinem rechten fůoß hinnein • vnnd schlag Im mit deinem hindern ort • zů seinem haůpt • versetzt er dir den schlag so trit mit deinem lincken fůoß aůf sein rechte seiten vnnd haw˚ Im mit deinem plat nach seinem rechten Arm haw˚t er dir also zů • so nimb Im das ab mit deinem hindern ort • vnnd wind Im deinen vordern • von vnden • ein zů seiner průst • Indes trit mit deinem Rechten schennckel hinnein vnnd schlag Im mit deinem hindern • ort zu seinem haůpt

206v
[Pdf-Seite 416]

Ain pruststoß mit ainnem sperren
10

Item schickh dich also In dises stůckh • stand mit deinem lincken fůoß vor • vnnd halt dein hellenparten ob deiner rechten průst • Indes stoß Im mit deinem vordern orth deiner hellenparten nach seiner průst • stastů dann aůch also gögen Im mit deinem rechten fůoß vor • vnnd Er dir also zů stost • so setz Im den stoß ab vornen mit deiner hellenparten Indes vberfall Im mit deiner hellenparten ÿber sein plat vnnd verker dich damit aůf dein lincke seiten • so sperrstů Im sein hellenparten • vnnd Inn dem sperren greiff mit deiner lincken hand zů deiner rechten Indem setz deinen rechten fůoß zůrůckh vnnd haw˚ Im oben nach seinem haůpt • haw˚t Er dir also oben zů • so trit mit deinem lincken schenckel zurůckh • vnnd setz Im das ab mit deinem vordern ort deiner hellenparten • Indem scheůb In starckh mit deiner hellenparten vbersich trit mit deinem rechten fůoß hinnein vnd wind Im deinen hindern Ort zů seinem hals • setzt er dir das ab so volg mit deinem lincken fůoß hinnach vnnd haw˚ Im mit deinem plat zů seinem haůpt • haw˚t er dir also oben ein • so versetz Im das zwischen deinen baiden henden • In dein Hellenparten • aůf dein rechte seiten haw˚ dich damit zwifach ZůRůckh

207r
[Pdf-Seite 417]

Ein vnderer průsthaw gögen ainem oberhaw
mit ainem reÿssen •
11

Item schickh dich also In Das zůfechten stand mit deinem rechten fůoß vor • unnd gee aůf mit dem vnndern průsthaw˚ Im zů seinem lincken arm vnnd verwechsel deine hend an deiner hellenparten Indem wend dich von deiner rechten aůf dein lincken seiten vnnd reiß damit an dich • reist Er dich also mit der sterckh zů Im vnnd dů mit deinem lincken fůoß vorsteest • so wechsel dein lincken hand behend důrch an deiner hellenparten • vnd haw˚ Im oben zů seinem haůpt • versetzt er dir das mit seinem vordern orth • so wind Im von vnnden zů seiner průst aůf sein rechte seiten • wirstů des stoß gewar • so setz deinen rechten fůoß zůrůckh vnnd nimb das ab mit deinem hindern ort • Indes arbait mit demselbigen ort von ainer seiten zů der anndern • volg mit deinem rechten schenckel hinnach vnnd wind Im dein hellenparten zwischen seinen beiden Armen hinnein zů • seiner průst vnnd wend damit dein hellenparten ÿber seinen lincken Arm last Er dann sein hand mit von seiner hellenparten • so prichstů Im den arm Begert er dir den arm also zů prechen • so verwechsel dein hand an deiner hellenparten Indes trit mit deinem rechten fůoß hinein vnnd stoß Im mit deinem hindern ort zů seinem gemechten • so magstů damit sein ledig werden

207v
[Pdf-Seite 418]

Zwaÿ obere Reÿssen aůß dem anpůnd
12

Item wann Ir baid Mit dem zůfechten zůsamen kůment vnnd ainannder angepůnden hapt • so trit mit deinem rechten fůoß fůr deinen lincken • vnnd wind Im dein plat vornen vmb seinen hals • Begert er dich also zů reissen mit seinem plat vnnd dů mit deinem lincken fůoß vorsteest • so wind Im aůch mit deiner hellenparten vmb seinen hals vnnd Inn dem winden so Raiss starckh an dich • Reist er dann also starckh an sich so trit mit deinem lincken schenckel hinnein vnnd nimb sein hellenparten mit deinem hindern Ort hinweckh aůf dein lincke seiten • Inndem far Im mit deinem hindern ort vornen vmb seinen hals vnnd setz deinen rechten schenckel hinder seinen lincken • Reiss damit aůf dein rechte seiten • so magstů In werffen • Begert er dich also zu w˚erffen so lass dein lincke hand von deiner hellenparten vnnd greÿff damit wol hinder seinen rechten Elenpogen • scheůb damit von dir • so bistů sein ledig • Indes greiff behend mit deiner lincken hand wider nach deiner hellenparten vnnd schlag Im nach seinem haůpt Indem wechsel dich damit von Im zůRůckh /

208r
[Pdf-Seite 419]

Ein vnders Reÿssen gögen ainem gewaltstoß
13

Item schickh dich also Stannd mit deinem lincken fůoß vor vnnd hallt dein hellenparten wol beÿ deinem lincken schenckel • das plat gögen dem Man • stat er dann also gögen dir Inn dem gewaltstoß seinen lincken fůoß fůrgesetzt • vnnd begert aůf dich zů stössen so gee mit deiner hellenparten Im vornen vmb seinen schenckel • vnnd wend dich damit von deiner lincken aůf dein rechten seiten so reisstů In • das dir sein stoß kainen schaden bringen kan vnd magstů In aůch werffen • hat Er dich also gefast vnnd begert dich zu w˚erffen • so laß dein hellenparten behend von seinem hals vnnd setz Im

Indes mit dem plat aůf sein hellenparten • vnnd truckh starckh vnnder sich so bistů des wůrfs ledig In dem far Im an seiner hellenparten behend aůf zů seinem gesicht • versetzt Er dir das so wechsel Im důrch von seiner lincken aůf dein rechte seiten • vnnd stoß Im nach seinem hals • versetzt er dir das fůrbas • so trit mit deinem rechten fůoß hinnein vnnd wind Im deinen hindern ort zů seinem gesicht • Arbait er dir also zů so setz deinen lincken fůoß zůrůckh vnd nimb Im seinen vordern ort mit deinem hindern hinweckh Indes trit mit deinem lincken fůoß hinnein vnd wind Im deinen vordern ort zů seinem gesicht • zeůch dich damit Inn dem wechsel zůruckh

208v
[Pdf-Seite 420]

Ain einwinden mit ainem wůrff
14

Item wann Ir baid mit Dem zůfechten zůsamen kůment vnnd gleich mitainnander angepůnden hapt • so wechsel Im důrch an seiner hellenparten • von seiner rechten aůf sein lincken seiten • vnnd stoß Im damit nach seinem lincken arm • wirt Er des stoß gewar • vnnd versetzt dir den so wechsel Im zwifach důrch vnnd sůch Im seine nechste ploß • sůcht er dir deine plossen also so streich mit deiner hellenparten von vnnden aůf Im vor seinem gesicht vnd In dem aůfstreichen haw Im nach seinem vordern Arm Indes pind Im starckh an sein hellenparten vnnd wechsel Im behend důrch vnnd stoß Im zwifach zů seinem gesicht • stost er dir also zwifach zů so nimb Im das ab mit deinem vordern Ort deiner hellenparten das dein lincker fůoß vor stee • stastů dann aůch gögen Im mit deinem lincken fůoß vor so nimb sein hellenparten mit deinem hindern Ort hinweckh trit mit deinem rechten fůoß hinder seinen lincken vnnd setz Im deinen lincken hindern ort vornen vmb seinen hals zeůch damit oben starckh an dich • so wirfstů In vber deinen rechten schenckel

209r
[Pdf-Seite 421]

Ain obers ybergeen mitsampt ainem seiten Stoß
15

Item schickh dich Allso mit disem zůfechen stannd mit deinem lincken fůoß vor vnnd hallt dein hellenparten aůf deiner rechten seiten den Ort gögen dem Man stat er dann aůch also gögen dir In dem zůfechten • so pind mit Im gleich an vnnd In dem anpůnd wind dein plat hinder seinen hagcken vnnd scheub damit vbersich • hat er dir dein hellenparten also gefast • vnnd scheůbt dich vbersich so trit mit deinem rechten fůoß hinder seinen lincken Inn dem zůckh dein • hellenparten oben vnnd stoß Im vnnden mit deinem hindern ort zů seiner lincken seiten • Indes setz deinen rechten fůoß wider zůrůckh vnnd haw˚ Im mit deinem plat zů seinem haůpt • arbait Er dir also zů • so nimb Im das ab mit deinem hindern ort • Indes volg mit deinem rechten fůoß hinnach vnnd haw˚ Im nach seinem lincken arm versetzt Er dir das • so wind Im mit deinem hindern ort zwischen baiden arm hinnein zů seiner průst Indes trit mit deinem rechten schenckel zůrůckh vnnd haw˚ Im nach seinem haůpt • so haw˚stů dich von Im

209v
[Pdf-Seite 422]

Ein vnderhaw˚ mit ainem absetzen In der halben
Hellenparten
16

Item schickh dich also Gegen dem Man In dem zůfechten stand mit deinem lincken fůoß vor vnnd hallt dein hellenparten aůf deiner rechten seiten • stat Er dann aůch also gögen dir Inn dem vnnderhaw˚ seinen rechten fůoß fůrgesetzt die hellenparten an seiner lincken seiten • so streich mit deiner hellenparten Im zů seinem gesicht • Geet er dir also zů deinem gesicht • so haw˚ Im von vnnden nach seinem lincken Arm • haw˚t er dir also zů deiner lincken seiten so setz Im das ab mit deiner halben hellenparten aůf dein rechten seiten vnnd Indem setz Im dein plat oben aůf seinen lincken Arm vnnd trůckh damit vnndersich trůckt Er dann also vndersich mit sterckh so trit mit deinem lincken schenckel hinder seinen rechten vnnd haw˚ Im mit deinem hindern orth zů seinem haůpt Indes zeůch • deinen rechten fůoß behend zůrůckh vnnd wind Im deinen vordern ort zů seiner průst • windt Er dir also ein • so setz Im das ab mit deiner halben hellenparten vnnd wind Im deinen hindern ort • vndern vber • seinen lincken Arm reiß damit aůf dein rechten seiten vnnd zeůch dich mit ainem oberhaw˚ von Im Zůrůckh

210r
[Pdf-Seite 423]

Ain schnit mit ainem Wůrff aůß dem hackhen
17

Item halt dich also Mit dem zůfechten aůs dem obern schnit stand mit deinem rechten fůoß vor vnnd halt dein hellenparten ob deinem haůpt das plat ÿber sich gewendt • stastů dann aůch also gögen Im deinen rechten fůoß fůrgesetzt • so halt dein hellenparten • aůf deiner rechten seiten Im zů seinem gesicht • In dem trit mit deinem lincken schenckel hinein vnnd setz Im dein plat vornen seinen hals • hat Er dir also angesetzt • so setz Im deinen hindern ort vnder sein linckhe Vchsen • scheůb damit aůf dein rechte seiten Indes trit mit deinem rechten fůoß zůrůckh vnnd schneid Im mit deinem plat oben nach seinem haůpt • schneidt er dir also nach deinem haůpt • so far aůf mit deiner hellenparten wol fůr dein haůpt vnnd versetzt Im den schnit mit deinem plat In dem trit mit deinem rechten fůoß hinder seinen lincken • vnnd nimb Im sein hellenparten oben mit deinem hindern Ort hinweckh nimpt er dir dein hellenparten allso hinweckh so trit mit deinem lincken fůoß zůrůckh vnnd wind Im mit deinem hindern Ort nach seinem lincken Arm • windt Er dir also zů so trit mit deinem lincken fůoß hinder seinen rechten • vnd setz Im das plat vornen an seinen hals vnd schlag Im den hagcken aůßwendig vmb seinen rechten fůoß Indes scheůb oben starckh von dir vnd zeůch vnden zů dir • so můoß er fallen

210v
[Pdf-Seite 424]

Ain verkerer gögen ainnem vnderhaw
18

Item schickh dich also In den verkerer • verwend dich aůf deinen rechten fuoß aůf dein lincke seiten herůmb In dem oberhaw˚ • das dein lincker fůoß gögen dem Man gewendt seÿ In dem haw˚ Im aůß dem oberhaw˚ zu seinem haůpt haw˚t Er dir also oben zů vnnd dů mit deinem lincken fůoß vorsteest • deinen hindern orth vornen aůf der Erden gögen dem Man • so far aůf mit demselbigen ort • vnnd nimb Im damit den haw˚ hinweckh • In dem trit mit deinem rechten schenckel hinein vnnd haw˚ Im aůss dem vnnderhaw˚ von vnden nach seinem lincken Arm versetzt er dir das so gee mit deinem hindern ort aůf dein rechten seiten Indes trit mit deinem rechten schenckel zůrůckh vnnd wechsel Im deinen vordern orth von seiner lincken aůf sein rechten seiten zů seinem gesicht • wechselt er dir also zů deinem gesicht so versetz Im das vornen an deiner hellenparten • In dem wind Im důrch an seiner hellenparten von ainer seiten zů der andern • vnd sůch Im die nechste ploß setzt er dir das ab • so trit mit deinem rechten schenckel hinein vnd nimb Im sein hellenparten mit deinem hindern Ort hinweckh stoß Im damit nach seinem gesicht oder der průst • Indes trit In dem wechsel zwifach zůrůckh

211r
[Pdf-Seite 425]

Ain hellenparten nemen mit ainem wurff
19

Item wann Ir mit dem Zůfechten zůsamen kůment vnd gleich mit ainannder angepůnden hapt • so wechsel Im důrch von seiner rechten aůf sein lincken seiten mit ainem stoß Nimpt er dir das ab so trit mit deinem rechten schenckel hinnein vnnd Nimb Im sein plat • mit deinem hindern • ort hinweckh auf dein rechte seiten • Begert er dir dein hellenparten also hinweckh zů nemen • so trit mit deinem lincken fůoß zůRůckh vnnd stoß Im deinen vordern ort zů seiner průst • versetzt er dir das • so trit widerůmb zwifach zů Im hinein vnd schlag Im mit deinem hindern • ort zu seinem haůpt • schlecht Er dir also nach deinem haůpt • so versetz Im das miten In deiner hellenparten Indes greiff mit deiner lincken hand nach seinem hindern Ort • vnd mit der rechten nach seinem vordern das dů die baid hellenparten In deinen henden habest • In dem trit mit deinem lincke~ fuoß aůf sein rechtes knie so magstů Im den schenckel entzwaÿ prechen • hat er dir die baid hellenparten allso zůsamen gefast • vnd begert dich zů treten so laß dein rechte hand von deiner hellenparten vnd far Im aůsswendig vmb sein kniebůg Indes scheůb oben mit deiner lincken hand starckh von dir vnd

zeůch vnden fast ÿber sich so můss er fallen, vnnd dir ^kansein arbait nit schaden

211v
[Pdf-Seite 426]

Ein bainprůch gegen ainem Nackstoß
20

Item wann Ir mit Dem zufechten zůsamen kůment vnnd gleich mit ainannder angepůnden hapt • so halt dein hellenparten Im gegen seinem gesicht • In dem wechsel ab an seiner hellenparten vnnd stoß Im damit zů seinem gesicht Wirt er des stoß gewar vnnd versetzt dir den • so trit mit deinem rechten fůoß hinnein vnnd wind Im deinen hindern Ort von vnnden nach seinem lincken Arm • Windt er dir also vnden zů so verwechsel dein lincke hand behend an deiner hellenparten vnnd stoß Im mit deinem vordern Ort • nach seiner průst • versetzt er dir das so schlag Im deinen hindern ort zů seinem haůpt schlecht er dir also oben ein so trit mit deinem rechten fůoß zůrůckh vnnd nimb seinen haw˚ mit deinem vordern ort hinweckh In dem pind Im starckh vnder sein hellenparten vnnd scheub damit vbersich Indes trit zwifach zů Im hinnein vnnd laß dein hellenparten fallen • Greiff mit deiner rechten hannd vnden an seinen lincken fůoß vnnd mit deiner lincken gewaltig aůf sein kniescheiben so magstů Im den schenckel prechen oder werffen hat er dich also gefast • so setz Im dein hellenparten aůf seinen Nackh vnd trůckh damit starckh vnder sich so prichstů Im sein Arbait

Paulus Hector Mair – Hellebarde